Cangkriman Bag 2

3.4 Mengenal, memahami, dan mengidentifikasi teks lisan dan tulis berbahasa daerah yang memuat cangkriman. 

Nyumurupi Isine Cangkriman

1. Cangkriman sing wujude wancahan (cekakan)

Tuladhane:

• Wiwa wite, lesmba dhonge, karwa pake = uwi dawa wite, tales amba godhonge, cikar dawa tipake.
• Pakbo letus = tipak kebo lelene satus.
• burnas kopen = bubur panas kokopen
• buta buri = tebu ditata mlebu lori
• gerbong tulis = pager kobong, watune mendhelis
• karla dheren = mbakar tela sumendhe keren
• pakbomba, paklawa, pakpiut = tapak kebo amba, tapak ula dawa, tapak sapi ciut
• rangsinyu, muksitu = jurang isi banyu, gumuk isi watu
• segara beldhes = segane pera, sambele pedhes
• tulas kerda = watu alas disengker walanda
• tuwok rawan = untuk krowok larane ora karu-karuan
• wit thoyung = yen dijiwit atho biyung

2. Cangkriman sing wujude pepindhan (irib-iriban)

Tuladhane:

• Sega sakepel dirubung tinggi = salak
• Gajah nguntal sangkrah = pawonan
• Bosok malah enak = tape
• Mboke dilus-elus anake diidak-idak = andha/tangga
• Emboke wuda anake tapihan = pring
• Kayu mati ginubet ula mati = gangsing / yoyo
• Pitik walik saba kebon = nanas
• Pitik walik saba meja = sulak
• Tibane ngisor, digoleki ndhuwur = genteng bocor
• Wit adhikih woh adhakah = wite cilik, wohe gedhe = semangka, melon
• Dikethok malah mundhak dhuwur = clana
• Dilebokne malah metu = benik / kancing baju
• Bocor malah kebak = prahu

3. Cangkriman sing wujude plesetan

Tuladhane:

• Wong wudunen iku sugih pari. Pari apa? Paringisan.
• Ana gajah numpak becak, ketok apane? Ketok mbujuke.
• Ana tulisan arab, macane saka ngendi? saka alas
• Wong adol krambil dikepruki. = krambile sing dikepruki/dipacaki
• Lawa lima kalong telu dadi pira? wolu / 8
• Urang sapikul matane pira? enem / 6
• Sing endhek didhudhuk, sing dhuwur diurug = timbangan

4. Cangkriman sing sinawung ing tembang

Tuladhane:

Bapak pucung renteng-renteng kaya kalung,

Dawa kaya ula,

Pencokanmu wesi miring,

Yen lumaku si pucung ngumbar swara.

Badhekane: sepur

Bapak pucung endi elor endi kidul,

Laku tapa brata,

Mung kepingin bisa malih,

Dadi kupu si pucung wedaring tapa.

Badhekane: enthung / kepompong

Bapak pucung amung sirah lawan gembung,

Padha kinunjara,

Mati sajroning ngaurip,

Mijil baka si pucung dadi dahana.

Bedhekane: penthol korek / korek api

Bapak pucung buntut dawa sirah gembung,

Mbanterake swara,

Lamun urip nganggo listrik,

Munggah panggung saben ana adicara.

Bedhekane: mik / mikropon

Latihan Soal